Buletin

Buletini i FSFE-së - prill 2015

Jonas Öberg viziton Bostonin pa çantë shpine rozë

Drejtori ynë Ekzekutiv i ri, Jonas Öberg foli në Libreplanet, dhe vizitoi Bostonin për t’u takuar me anëtarë drejtues dhe staf të FSF-së. Në postimet e veta në blog ai shkroi rreth takimeve me Matthew Garret-in, Benjamin Mako Hill-in, Bradley Kuhn-in, Henry Poole-in, anëtarë drejtues të FSF-së, të stafit, si dhe me Drejtorin Ekzekutiv të FSF-së, John Sullivan, për të diskutuar si të përmirësohet bashkëpunimi, dhe rreth dy sfidave kryesore ndaj FSFE-së, siç i sheh ai:

• analizimi i Software-it të Lirë nga ana ligjore, teknike dhe shoqërore, dhe si të bëhet e mundur të përballohen çfarëdo sfidash ndaj Software-it të Lirë në këto fusha,
• duke siguruar që në një botë me gjithçka të lirë dhe të hapur, Software-i i Lirë të jetë ai që lidh gjithçka tok: pa patur Software të Lirë, s’mund të keni të dhëna të hapura, ekologji të hapur, qeverisje të hapur apo burime arsimore të hapura.

Në vazhdim ai i rikthehet vizitës së tij të parë, atëbotë webmaster i GNU-së, në dhjetor 1999, me një çantë shpine rozë.

FSFE-ja përkrah Christoph Hellwig-un në çështjen gjyqësore për zbatimin e detyruar të GPL-së

FSFE-ja mirëpret hapin që Christoph Hellwig-u dhe Software Freedom Conservancy po ndërmarrin që VMware-i të jetë në pajtim me licencën GNU General Public License.

Software-i i Lirë është burim publik, dhe qeveriset nga rregulla ligjore dhe norma shoqërore. Cilido që përfiton nga ky burim, pa respektuar këto rregulla dhe norma, dëmton bashkësinë në tërësi. Shumica e problemeve të tilla janë zgjidhur me dialog dhe vullnet të mirë. Vetëm kur dështon dialogu, bëhen të nevojshëm hapat ligjorë për ta mbrojtur këtë burim të përbashkët të të gjithëve.

Edhe pse FSFE-së i vjen keq që puna shkoi deri në një çështje ligjore, besojmë se mbrojtja e Software-it të Lirë, kundër atyre që përpiqen të përvetësojnë atë që na përket krejt neve, është e rëndësisë më të lartë.

Deklaratë e përbashkët mbi përdorimin e Standardeve të Hapura në Komisionin Europian

Standardet e Hapura janë formate dhe protokolle që cilido mund t’i përdorë pa pagesë dhe kufizime, dhe për të cilët nuk është i domosdoshëm software i caktuar, prej një tregtuesi të dhënë. Është e rëndësishme që çdo shtetas dhe kompani e BE-së të kenë të drejtën të komunikojnë dhe ndërveprojnë me administratën e tyre përmes përdorimit përjashtimisht të Standardeve të Hapur, dhe jo të jenë të detyruar të instalojnë dhe përdorin software prej një tregtuesi të caktuar.

Ditën e Lirisë së Dokumenteve (DLD), ditë ndërkombëtare për të kremtuar dhe shtuar ndërgjegjësimin mbi Standardet e Hapura, April (organizmi frëng për Software të Lirë), European Digital Rights (EDRi), Open Forum Europe (OFE), Open Source Business Alliance (OSBA), dhe FSFE-ja botuan një deklaratë të përbashkët. Përtej vënies së theksit në përgjithësi mbi temën, deklarata përqendrohet në përdorimit jo të saktë të standardeve në kontekstin e aplikimit për programe të BE-së. (Një raport të plotë rreth mbi 60 veprimtari për DLD-në, në 31 vende, do të botohet në fillim të prillit.)

Diçka krejt tjetër

• Sa transparent duhet të jetë Parlamenti Europian? Në rregullat e veta mbi procedurat, Parlamenti i ka caktuar vetes standardin e lartë të zhvillimit të veprimtarisë së tij nën “transparencën maksimale”. Presidenti ynë Karsten Gerloff raporton nga një diskutim me interes, “Sigurimi i transparencës maksimale – Software i Lirë dhe Standardet e Hapura sipas Rregullave Mbi Procedurat në Parlamentin Europian”, dhe se ç’do të thotë kjo në praktikë.
• Ministria gjermane e Ekonomisë botoi (në gjermanisht) një projektligj fillestar për të ndaluar rrugëzuesit e detyruar. Hiq mungesën e masave detyruese, FSFE-ja e përshëndet draftin. Po përditësojmë rrjedhën kohore dhe faqet tona përmbledhëse, që kështu njerëz jashtë Gjermanisë të mund të ripërdorin përvojën tonë për të luftuar kundër rrugëzuesve të detyruar edhe në vende të tjera.
• Në një diskutim të organizuar nga Zyra Europiane e Patentave, mbi patentat, standardet, dhe Software-in e Lirë autori i këtyre radhëve qe dëshmitar i një kthese të papritur, por pozitive.
• The New Yorker shkruan mbi tridhjetëvjetorin e Manifestit të GNU-së dhe botoi një artikull më të gjatë mbi Richard Stallman-in dhe fillimet e GNU-së dhe copyleft-it.
• Çmimi i Software-it të Lirë këtë vit i shkoi Sébastien Jodogne-ës, për punën e tij për software të lirë për përftim dhe përpunim pamjesh në mjekësi, përmes projektit të vet Orthanc, dhe Reglue-së, që jep kompjutera me GNU/Linux për fëmijë të paprivilegjuar dhe familjet e tyre në Austin, Teksas.
• FSFE-ja i uron Nicolas Dietrich-ut mirëseardhjen në Asamblenë e Përgjithshme. Ai u zgjodh nga anëtarët shok, dhe do të jetë një nga dy drejtuesit e Asamblesë së Përgjithshme të Anëtarësisë Shok.
• Nga grumbullimet planet:
• Peter Bubestinger-i shpjegon se si i shpëtoi me Software të Lirë këngët në iPod-in e një shoku.
• Në punën e tij të re, ish-stazhieri i FSFE-së, Nicolas Jean-i, botoi EvQueue, një planifikues aktesh dhe mekanizëm vëniesh në radhë, si Software të Lirë.
• Paul Boddie shkruan mbi Micro Bit-in e BBC-së, një pajisje kompjuterike, që BBC-ja ka në plan t’ia japë çdo fëmije 7 vjeç e sipër në Britani.
• Franz Gratzer-i hedh dritë mbi disa intervista të bëra gjatë FOSDEM-it, dhe shkruan mbi praninë e freie.it, themeluar nga disa anëtarë të grupit vjenez të anëtarësisë shok të FSFE-së, si një platformë web për të ndihmuar njerëz që janë të interesuar të përdorin Software-in e lirë, por që nuk duan të administrojnë vetë kompjuterat e tyre.
• Anëtari shok Karl Beecher shpjegon pse shoqëria e tij Endocode e përkrah FSFE-në, si dhurues i argjendtë, dhe
• Mirko Böhm-i, gjithashtu pjesë e Endcode-it, shkruan mbi veprimtaritë e tij, përfshi takimin me Jonas Öberg-un, drejtori i ri ekzekutiv i FSFE-së.
• Nico Rikken-i shkruan mbi diskutimet e veta me prodhues të Fairphone-it
• Mario Fux-i vret mendjen nëse Konqi -- maskoti i KDE-së -- është mashkull apo femër.
• Dhe Daniel Pocock-u shpjegon se si mund të bëheni furnizuesi i vetvetes me OpenID.

Aktivizohuni: Përhapni mesazhin me sende Software i Lirë

Gjatë javëve të fundit, shumë vetë porositën ngjitësat tonë “S’bëhet fjalë për re, por thjesht për kompjuterat e të tjerëve”. Tani Rich Folsom-i hartoi një shtojcë për shfletuesin Chromium, që e shndërron “renë” në “kompjutera të të tjerëve”.

Ngaqë slogani u pëlqeu shumë njerëzve, tani, në shitoren tonë, kemi edhe çanta “S’bëhet fjalë për re, por thjesht për kompjuterat e të tjerëve”. Më tej, kemi një bluzë të re për Standardet e Hapura, me robotë, blu e çelët, pas trupit, ose ngjyrë kaki, jo pas trupit, bluzën “E dua Software-in e Lirë”, blu e çelët, dhe bluza gri “Hacking for Freedom”, pas trupit, ngjitësa gri metalike “GNU/Linux inside” dhe një stemë të artë GNU.

Nëse doni të përhapni mesazhin e Software-it të Lirë në punë, konferenca, ose gjetiu, mund t’i porositni të tëra këto te faqja jonë e artikujve tregtarë.

Faleminderit krejt vullnetarët, anëtarët shok dhe korporatat dhuruese që bëjnë të mundur punën tonë,
Matthias Kirschner - FSFE